በዕውነት ሀይማኖት አለኝን?

የርሶ ብዕር አስተያየት ተሳትፎ ሕብረተሰባችንን ይጠቅማል ያሉትን አይንፈጉን ገንቢነቱ ቦታ ይኖረዋልና!

ማሳሰቢያ፡ ይህ ገጽ የተዘጋጀው የተለያዩ የኅብረተሰባችንን ሀሳብ ለመለዋወጫ እንጂ ለሚሰጡት ማንኛውም አስታየቶች በማንኛውም መንገድ ተጠያቂ አይደለም። ጉግል ድርጅትም ኃላፊነት አይወስድም። ኃላፊነቱ በሙሉ የአስታየት ሰጪው ብቻ ነው።


በዕውነት ሀይማኖት አለኝን?

ሀይማኖት ምንድን ነው የሚለውን ጥያቄ በአጭሩ መንፈሳዊ እምነት፣ ይኸውም ከአምስቱ ህዋሳታችን ማለትም ማየት፣ መስማት፣ ማሽተት፣ ማጣጣምና መዳሰስ ውጭ የሆነና በእንግሊዘኛው አጠር ያለ ትርጉም ደግሞ የሚቀጥለውን የሚያካትት ሆኖ ተዘግቧል፡-
 (re·li·gion [ri líjjən](plural re·li·gions)
n
1. beliefs and worship: people's beliefs and opinions concerning the existence, nature, and worship of a deity or deities, and divine involvement in the universe and human life
2. system: an institutionalized or personal system of beliefs and practices relating to the divine
3. personal beliefs or values: a set of strongly-held beliefs, values, and attitudes that somebody lives by

የተወደዳችሁ የገጻችን ተከታታዮች እንደምን አላችሁልን? ደግሞና ደጋግሞ ክብሩና ኃይሉ የማያልቅበትና የሚመሰገነው ልዑል እግዚሀብሔር፣ አሁንም ለክቡር ስሙ  ምስጋና ለእርሱ ይሁን።

ለዛሬ ይዘንላቹህ የቀረብነው  እያንዳንዳችን ጊዜን ወስደን ራሳችንን እንድንመረምር፣ የክርስትና ሕይወታችንን እንድናውቅ ይረዳን ዘንድና ምን ያህልስ ለያዝነው የክርስትና እምነት መተገብርና እንክብካቤን እናደርጋለን የሚለውን እንድንዳስስ ስለሆነ ከዚህ በታች የቀረበውን ጥሁፍ በጥሞና እንድትከታተሉ እናሳስባለን።

የኢትዮጵያ ኦርቶዶክስ ተዋህዶ እምነት ተቀብለናል የምንል ሁሉ፤ ከእምነቱ የሚጠበቅብንን ሁሉ መፈጸም የግድ ነውና። ምክንያቱም ከሌላው የክርስትና እምነት የሚለየን ብዙ ነጥቦች ቢኖሩም የኛ ግን መሰረቱና መመራያው “ሀይማኖት ምግባር ነው“ የሚል ነው። ስለዚህም ሳይነጣጠል ሀይማኖትና ምግባር አብሮ የሚሄድ መሆኑን ማንኛውም የእምነቱ ተከታይ በሚገባ ጠንቅቆ የማያውቅ ካለ እርሱ/እርሷ ሀይማኖታቸውን አያውቁምና ከዜሮ መጀመር ይገባል።

ያለፉት አባቶቻችን ጦር ክተት የሚል አዋጅ ሲመታ ለሀገራቸውና ለሀይማኖታቸው ቀናኢ ሆነው ሲነሱ ካህንም ታቦት ይዞ ወጥቷል። እንደእኛ ዘመን የተሻለ እውቀት ሳይኖራቸው ጥያቄም ሳያደርጉ ለሀይማኖታቸውና ለሀገር ፍቅር በመቃጠል ቀፎው እንደ ተደፈረበት ንብ በመቆጨትና በቁጣ እንደወጣ ታሪኩ በማስረጃ ተደግፎ  ይገኛል። እኛስ ሀይማኖታችን ከውስጥም ሆነ ከውጭ ሲደፈርብን ያንን ያህል ቁጭት ይዘን በቁርጠኝነት እንፋለማለን?

በወቅቱ ከፍተኛውን የክህነት ሥልጣን ይዘው የነበሩት ኢትዮጵያዊው አቡነ ጴጥሮስ ለሀገርና ለሀይማኖታቸው ሲሉ ማንኛውንም ድለላ ብሎም ማስፈራሪያ አሻፈረኝ በማለት ደረታቸውን ለጥይት የሰጡ ቆራጥና ጀግና የሀይማኖት መሪ እንደነበሩ ለማንም የማይካድ ነው። ስለዚህ ይህ ሰማዕትነታቸው ከትውልድ ትውልድ የሚኖርና ሌላው የሀይማኖት ምግባራዊነት ታላቅ ተምሳሌት ናቸው። እኛስ ሌላው ጴጥሮሳዊ ነንን? ወይስ የስም ኦርቶዶክሳዊ ብቻ?

ኦርቶድክስ እምነት የተቀበልን ሁሉ ወይንም እምነቱን ተከታይ ነን የምንል ሁሉ ተግባራዊ እስካላደረግን ድረስ የስም ነጋጆች እንጂ ሀይማኖቱ የለንም አሊያም አናውቀውም ማለት ነው። ያመነ ሁሉ እምነቱን መንከባከብና የመጠበቅ ግዴታ አለበትና። ላመነበትም መስዋዕትን ጨምሮ መክፈልም ይገባዋልና። ለዚህም ነው የዘመኑ ኦርቶዶክስ ሀይማኖት ተከታዮች ነን ባዮች ከውስጥም ሆነ ከውጪ ለሚሰነዘርባቸው ጥቃቶችም ሆነ አጽራረ ቤተክርስትያን ወገኖች ጆሮ ዳባ ልበስ ወይንም አይተው እንዳላዩ ሆነው እንደሚገኙም እሙን ነው። እንግዲህ እምነቱን ከነምግባሩ ካልያዝነውና እምነታችንና ቤተ ክርስትያናችንን ተንከባክበን ካልጠበቅን ፤ ለሚተናኮሉም ካልተቋቋምን፤ ያለፉት አባቶቻችን የተውልንን የመስዋዕት አርያነት ካልተከተልን ኦርቶዶክሳዊነታችንን ከጥያቄ ነው የምንዶለው።

በተለይም በምዕራቡ አህጉር ውስጥ የሚገኙ ቤተ ክርስትያኖች አካባቢ ምዕመን ነን እያሉ ራሳቸውን የሚመጻደቁ ወገኖቻችን አውቀውም ሆነ ሳያውቁ ፣ ቤተ ክርስትያን ስለገቡና ስለወጡ ብቻ የእምነቱ ተከታይ አድርገው እራሳቸውን የሚቆጥሩ ፣ ረፈድ አድርገው በመግባት በአዳራሹ በቅዳሴና በትምህርት ሰአት ሌላ የሚከውኑ፣ ወይንም በሳምንት አንዴ ብቻ ብቅ በማለት ከወዳጅና ጓደኛ ፍለጋ ብሎም ወሬና ነገር ለመቃረም ፣ ወዘተ…የሚያደርጉ፣ የእግዚሀብሔርን ለእግዚሀብሔር የሚለውን አስራትና ሙዳየ ምጽዋት የማያደርጉ የመሳሰሉት የሀስት ኦርቶዶክሳዊያን ቁጥራቸው እየጨመረ መጥቷል። ከእነዚህ ኣይነቶችም ውስጥ አጽራረ ቤተ ክርስትያኖች የሆኑ ይደመሩባቸዋል። በየደብሩ እንደዚ አይነቶቹ የሀሰት ኦርቶዶክሲያኖች የሚቀሰቀሰው ኦርቶዶክሳዊ ያልሆነ የቤተክርስትያንን ሰላም ማደፍረስ ችግሮች በየቦታው እየተከሰተ ይገኛል። ለዚህ እርኩስ መንፈስ ተግባር የሆኑ የበግ ለምድ ለብሰው ከበጎች የተቀላቀሉትን አጽራረ ቤተ ክርስትያን እውነተኛ የኦርቶዶክስ ልጆችና እውነተኛ ካህናቶች የሆኑ ሁሉ ለሀይማኖታቸው ሲሉ ሊመነጥሩዋቸውና ሊያጠፋቸው ይገባል። የሀይማኖቱ እምነት አለኝ የሚል ኦርቶዶክሳዊ ሁሉ ከሁሉም በላይ ለፈጠረው አንድ አምላኩና እምነቱ ቀናዊ ካልሆነ፤ በወዳጅና ጓደኛ፣በጋብቻ ወይንም በስጋ ዝምድና፣ በማህበር ወይንም በድርጅት አባልነት፣ ጠለቅ ባለ እውቀት ወይንም አብሮ መኖር አሊያም በውለታ ብሎ ሀይማኖቱን ወይንም እምነቴ ብሎ የተቀበለውን በተለያየ መንገድ ሲቃወሙ  ሆነ ሲተናኮሉ ማሳለፍ ወይንም እምነቱን ሲፈታተኑበት በዝምታ ወይንም በይሉኝታ ማለፍ ወይንም ማሳለፍ በፍጹም ኦርቶዶክሳዊነት አይደለም።

ለዚህም በምሳሌነት በመውሰድ የምንጠቅሰው ከዚሁ የምዕራቡ ክፍለ አህጉር ውስጥ የናንተ የዳላሱ የኢትዮጵያ ኦርቶዶክስ ተዋህዶ ደብረ ምህረት ቅዱስ ሚካኢል ካቴድራል ደብር ቢሆንም ሌሎችም በአህጉሩ ውስጥ በተመሳሳይ ፈተና ያለፉ እንዳሉ ግልጽ ነው። ከሌሎች ተመክሮ እንዳገኘነው፤ እውነተኛ የኦርቶዶክስ ልጆች አንድ ሆነው ከስራቸው የፈለቁባቸውን አጽራረ ቤተ ክርስትያን ቡድን መምታት ብቻ ሳይሆን ከቤተ ክርስትያናቸው አጥፍተዋቸዋል፤ ወደ ፊትም ተመሳሳይ ፈተና እንዳይገጥማቸው ጠንቅቀው እየጠበቁ ይገኛሉ። እናንተም ዳላሶች እውነተኛ የኦርቶዶክስ ልጆች የሆናችሁ ሁሉ በእምነታችሁና በደብራችሁ ላይ የተነሱባችሁ እነዚሁ እምነቱ የሌላቸውና የደብራችሁ ጠላቶች ምን ቢቦድኑ፤ የሀሰት አሉባልታን በመካከላችሁ ቢያሰራጩ፣፣ በዘር፣ በጎሳ፣ በጋብቻና በስጋ ዝምድና፣ በጓደኝነትና ወዳጅነት፣ በጥቅማጥቅም በመደለል፣  በፖለቲካ ሊለያዩዋችሁ ቢሞክሩ፣ በአለም ፍርድ ቤት ላይ ቢያቆሟችሁ፣ በመተዳደሪያው ደንብ የመረጧችኃቸውን አስተዳዳሪዎችን የተመረጡበትን ሀላፊነት በቅንነት ስለተወጡና ለነሱ መጥፎ ተግባር አሻፈረኝ ስላሉ፣ የቤተ ክርስትያናችሁን መተዳደሪያ ሥርዐት ለመናድ ሲያውኳችሁ፣ ምእመናን የሚገባቸውን የቤተ ክርስትያን የንዋይ ስጦታና መባ እንደዚሁም በአባልነት የተመዘገቡት የአባልነት ክፍያቸውን  እንዳያገቡ ሲያሳድሙባችሁ፣ በአደባባይና በስብሰባቸው እኛ ሚካኤል የምንሄደው ለፀሎት አይደለም ነገር ግን የምንሄደው ለመታዘብና ነገር ለመፈለግ ነው ብለው የሚናገሩ፣ ፍጹም የኦርቶዶክስ እምነት የሌላቸው አዋኪያን፣  ወዘተ…… የከፈቱባችሁን አጽራረ ቤተ ክርስትያንና ጸረ እምነታችሁን  ምሽግ የምታፈርሱት እናንተው እውነተኛዎቹና በዳላሱ የቅዱስ ሚካኤል ደብር ያላችሁ የኦርቶዶክስ ልጆች ብቻ ናችሁ።

ዛሬም እንደትላንቱ አባቶቻችን በመስዋዕትነት ያቆዩልንን ይቺን ብቸኛና ብርቅዬ የሆነች የተዋህዶ ኦርቶዶክስ እምነታችሁን ለተተኪዎቻችን ለማቆየት የታሪክ ብቻ ሳይሆን የእምነቱም ግዴታና ሀላፊነት በናንተ ላይ ብቻ ነውና ይህን የቃቱባችሁንና የተነሱባችሁን ጠላቶች፤ በአመራር ላይ በተመረጡት የቦርድ አባሎቻችሁ መሪነት (እስካሁን ቦርዳችሁ እየከፈለ ያለው ተገቢ መስዋዕት ስለሆነ) በመታቀፍ፤ በሌሎች ከተማ ውስጥ ለተመሳሳይ ፈተና እንደተገበረው ሁሉ እናንተም የኦርቶዶክሳዊ ግዴታችሁን መወጣት ዛሬ ወይንም ነገ የማይባል የወቅቱ ግዴታችሁ ነው። ይህንን ግዴታችሁን ሳትወጡ ወይም ችላ ብትሉ፤ “መምጫዬን ማንም አያውቀውም“ ተብሎ እንደተጻፈው ሁሉ፤ በእምነታችሁ ለመጣ ፈተና በእምነታችሁ ጸንታችሁ አለመገኘት ሆኖ እንዳይቆጠርባችሁ፤ በጾም በፀሎት ጠንክራችሁና ሀይማኖታችሁን በምግባር ገልጻችሁ ፣ ደብራችሁን ተንከባክባችሁ በመጠበቅ፣  የጌታችንና መድህናችን የሆነው ኢየሱስ ክርስቶስ ለኛ ሲል የከፈለውን እንደዚሁም አባቶቻችንና እናቶቻችን የከፈሉትን መስዋዕት በማስታወስ ፤ በማንኛውም መንገድ ተዝጋጅታችሁ መክፈል ያለባችሁን ተገብራችሁ ለዘላለማዊው መንግስቱ ትበቁ ዘንድ የተዘጋጃችሁ ሁኑ። ለዚሁም ልዑል እግዚሀብሔር የበቃችሁ ያድርጋችሁ። አሜን።


እርሶስ ምን ይላሉ?